Гершкович ва Уилан Люблянадаги россиялик нолегалларга алмаштирилиши мумкин

Россияда ҳибсга олинган Америка фуқаролари, жумладан The Wall Street Journal (WSJ) журналисти Эван Гершкович ва жосусликда айбланиб судланган собиқ ҳарбий Пол Уилан Словенияда фош этилган россиялик жосусларни алмашиш бўйича Москва билан келишув бир қисми бўлиши мумкин. Бу ҳақда 17 июн, душанба куни ўзининг хабардор манбаларига таяниб, WSJ ёзмоқда. 

Нашрнинг ёзишича, гап Бошқирдистон ва Нижний Новгородда туғилган, ўзларини Аргентина фуқаролари сифатида таништирган ва 2022 йил охирида Люблянада қўлга олинган Артем ва Анна Дулцевалар ҳақида кетмоқда. WSJ қайд этишича, улар псевдоаргентиналиклар ва Интерпол ихтиёрида бўлган Дулцевларнинг бармоқ изларини солиштириш орқали аниқланган. 

Кремл «аргентиналикларни» Словениядан қайтаришга тайёрлигини маълум қилди

Ҳибсдан кўп ўтмай, Россия Словения расмийлари билан алоқа ўрнатди ва эр-хотин «СВР» учун ишлаганини тан олди ҳамда Россия президенти Владимир Путиннинг узоқ йиллик яқин иттифоқчиси, Россия Хавфсизлик кенгашининг собиқ котиби Николай Патрушев бошчилигидаги музокаралар давомида Кремл уларни қайтаришга қизиқиш билдирган, деб ёзади АҚШ газетаси.

Словениялик ва америкалик юқори мартабали амалдорлардан олинган маълумотларга кўра, «Майер Мунос» ва «Гиш» номли онлайн санъат галереяси ва IT-стартапини бошқарган нолегаллар 18 ойдан ортиқ вақтдан бери Словения қамоқхонасида сақланмоқда, уларнинг икки нафар боласи оилалардан бирига бериб юборилган. Россия агентларига қарши суд маҳкамаси ёпиқ эшиклар ортида ўтмоқда, биринчи қарор яқин ҳафталарда чиқиши кутилмоқда. 

Кремл ҳам, «СВР» ҳам WSJ журналистларининг изоҳ бериш ҳақидаги сўровларига жавоб қайтармади.

Словения қонунчилигида айғоқчилик учун кўзда тутилган максимал қамоқ муддати саккиз йилни ташкил этади ва яхши хулқ-атвор учун эр-хотин тўрт йилдан кейин озод қилиниши мумкин, деб таъкидлайди The Wall Street Journal.