“Яккаланган давлат бўлмаслигимиз керак” – ЕХҲТ Парламент ассамблеяси президенти

7 апрел куни ассамблеяда чиқиш қилган Ўзбекистон президенти расмий Тошкент дунёдаги ҳар қандай зиддият ва можароларни дипломатия ҳамда тинч йўл билан ҳал этиш тарафдори эканини яна бир марта эслатди. Ассамблея дебатларида қатнашган ЕХҲТ Парламент ассамблеяси президенти, Финландия парламенти аъзоси Пиа Кауманинг айтишича, давлатлар изоляцияланган бўлмаслиги керак. Диалог ва келишувлар – ҳар қандай можаронинг ечими бўла олади, дейди у.

- Президент Украина, Ғазодаги урушларни дипломатия билан ҳал қилиш кераклигини гапирди. Дипломатиянинг ўзи можароларни тугатиш учун етарли бўладими?

“Дипломатия ва келишувлар – бунинг ягона йўли холос. Биз изоляцияланган давлатлар бўлиб қолмаслигимиз керак. Чунки яккаланган давлатлар бир-бирини камроқ тушунади. Биз ҳам бу ерда парламент дипломатияси тарғиботи учун турибмиз. ЕХҲТ диалог – ҳамма нарсанинг калити деб билади” – Пиа Каума, ЕХҲТ Парламент ассамблеяси президенти

Сиёсатчи Марказий Осиёдаги жараёнларга ҳам эътибор қаратаркан, ўтган ҳафта Европа Иттифоқи билан имзоланган стратегик шериклик ҳужжатига тўхталди. Беш давлатнинг ҳамкорлиги транспорт, энергетика билан тугамай, инсон ҳуқуқлари борасида ҳам давом этиши керак, дейди Парламент ассамблеяси президенти.

“Беш давлатнинг раҳбари мунтазам учрашади деб эшитаман. Биласиз, Европа шимолида 5 та NORDIC давлатлари бор, биз ҳам мунтазам кўришиб, муаммоларимизни муҳокама қиламиз. Евроиттифоқ билан шериклигингиз фақат сув, ток, энергетика ёки бошқалар билан чекланмаслиги керак. Инсон ҳуқуқлари, демократик жамият қуриш ва бу жамиятда гендер тенглик бўлиши учун ҳам иттифоқ билан алоқалар жуда муҳим. Биз тез жамиятлар қурдик, лекин шу жамиятларда аёлларнинг ўрнини афсуски, унутдик. Болаларимиз ва ёш авлод бўладиган жамиятларимизда инклюзивлик бўлиши керак” - Пиа Каума, ЕХҲТ Парламент ассамблеяси президенти

- Дунё бўйлаб демократия жиддий таҳдид остида, дея оламиз. Парламентлар бундай жараёнда бирор ролга эгами ўзи? Ўзбекистонда-чи, Республикадаги парламентнинг ролини қандай баҳолайсиз?

“Ташкилотимизда ўзбек делегацияси узоқ йиллардан бери бор. Демократиянинг реал ҳолатини яхшилаш учун ишлашганига гувоҳ бўлганман. Конституциянгизни ўзгартираётганингизда ўлим жазосини ундан олиб ташлаганингиз, ўлимни тақиқлаганингиз бизни қувонтирган. Бу жуда яхши тузатиш бўлганди” - Пиа Каума, ЕХҲТ Парламент ассамблеяси президенти.