Sirdaryo viloyati – 1963 yil 16 fevralda tashkil etilgan. Shimoldan Qozog‘iston Respublikasi, sharqdan Toshkent viloyati, janubdan Tojikiston Respublikasi va g‘arbdan Jizzax viloyati bilan chegaradosh. Tarkibida 9 tuman, 5 shahar, 6 shaharcha va 75 qishloq fuqarolari yig‘ini bor. Markazi — Guliston shahri.

Sirdaryo viloyatida, asosan, o‘zbeklar (60%), shuningdek, qozoq, tojik, rus va boshqa 70 dan ortiq millat vakillari yashaydi. Viloyat xo‘jaliklari, asosan, paxta yetishtirishga ixtisoslashgan. Sanoati paxtani va boshqa qishloq xo‘jaligi mahsulotlarini qayta ishlashga qaratilgan.

Siz mintaqaga baliq ovi uchun borishingiz mumkin, chunki Sirdaryoda juda ko‘p baliqlar uchraydi – yirik zog‘orabaliq va xumbosh baliqdan tortib ilonbaliq va sudaklargacha! Sirdaryo – unutilmas xushbo‘y hidi va shirin ta’ mi bilan butun dunyoga mashhur bo‘lgan Mirzacho‘l qovunining vatanidir.

Sirdaryo viloyati paxtachilik, pillachilik, polizchilik va chorvachilikka ixtisoslashgan. Viloyatda Sirdaryo elektr stansiyasi va Farhod gidroelektrostansiyasi ishlamoqda, ular mamlakatdagi barcha elektr energiyasining 1/4 qismini ishlab chiqaradi.

Maydoni: 5 100 km²

Aholisi: 900,9 ming kishi.