Dehli havosidagi tutun 1700dan ortiq maktab yopilishiga sabab bo‘ldi

Hindiston poytaxtidagi 1700dan ortiq munitsipal maktablar shanba kuni faoliyat ko‘rsatmadi, deya xabar qilmoqda mahalliy OAV. 

Shahar havosidagi tutunning me'yordan o‘ta ortiqligi sabab qabul qilingan qarorga ko‘ra yopilgan 1747ta maktabda 900 ming o‘quvchi ta'lim olishi aytilmoqda. Umuman, shu paytgacha maktablar noqulay ob-havo sharoitiga qaramay, ta'lim jarayonini davom ettirish borasida mustaqil qaror qabul qilib kelayotgan edi. 

Maktablar dushanba kuni darslarni boshlaydi. Biroq, har bir ta'lim muassasasi vaziyatdan kelib chiqqan holda boshqacha qaror chiqarishi mumkin. Ayrim maktablarda sport mashg‘ulotlari va ochiq havoda har qanday marosim o‘tkazish taqiqlangan. 

So‘nggi kunlarda Dehli havosi “o‘ta xavfli”, deb baholanmoqda. Bunga, 29-30 oktabrdagi hindular bayrami Divali munosabati bilan petardalar portlatilgani, feyyerverk va portlagichlar otilgani sabab bo‘lgan.