Chelik Turkiyaning YeIga a'zo bo‘lishiga norozilarni irqchilikda aybladi

Turkiyaning YeI ishlari bo‘yicha vaziri Umar Chelik, Turkiyaning YeIga a'zoligi bo‘yicha muzokaralarni muzlatishga chaqirayotganlarni irqchilikda aybladi, deb xabar qilmoqda Reuters.

U bu haqda YeI vakillari bilan Anqarada o‘tkazgan uchrashuvidan so‘ng tashkil etilgan matbuot anjumanida so‘z yuritgan. 

Chelikning so‘zlariga ko‘ra, Turkiya va YeI munosabatlari «zaif» davrni boshidan kechirmoqda. 

Eslatib o‘tamiz, Yevropa mamlakatlari Turkiya parlamentining Xalqlar demokratik partiyasi fraksiyasi a'zolari hibsga olingach, rasmiy Anqarani keskin tanqid qilgan edi. 

Ularning hibsga olinishiga, Turkiya hukumatining izohiga ko‘ra, deputatlarning Kurdiston ishchi partiyasiga aloqadorliklari sababdir. Ma'lumki, bu siyosiy harakatning Turkiyadagi faoliyati taqiqlangan.  

Bundan avval, Turkiya prezidenti Erdo‘g‘an KIPni qo‘llab-quvvatlagani uchun Yevropani terrorizmga yordam berayotganlikda ayblagan edi.