Islandiyalik sportchi immigratsiya farmoni sababli AQShga kiritilmadi

Islandiyalik taekvondochi Meysam Rafiyeining ma'lum qilishicha, u tug‘ilgan yurti tufayli AQShga kiritilmagan. Xabarlarga ko‘ra, Meysam asli eronlik bo‘lib, Islandiyada faoliyat yuritadi va istiqomat qiladi hamda ushbu mamlakat fuqaroligiga ega. 

«Men Islandiya terma jamoasi safida AQSh ochiq chempionatida ishtirok etish uchun Islandiya pasporti bilan yo‘l olgan edim. Biroq, mening Eronda tug‘ilganligim tufayli ruxsat berishmadi», — degan Rafiyei Facebook sahifasida.

Eslatib o‘tamiz, AQSh davlat rahbari Donald Trampning farmoniga ko‘ra, Suriya, Eron, Iroq, Yaman, Sudan, Liviya va Somali fuqarolariga AQShga kirishlari uchun 90 kunlik cheklov joriy qilingan.