NATO rus saytlarini soxta xabarlar tarqatishda aybladi

NATO Rossiyani o‘z nazoratidagi OAV orqali soxta axborotlar tarqatib, eskalatsiya kampaniyasi olib borishda aybladi. Bu haqda Shimoliy Atlantika alyansi matbuot kotibi Oanu Lungeskuga asoslanib Reuters agentligi xabar tarqatdi. 

«NATO Rossiya propagandasi sezilarli darajada o‘sganini qayd etdi. Bu 2014 yilda Qrimning Rossiya tarkibiga qo‘shib olinishi ortidan ro‘y berdi», — degan Lungesku xonim.

Uning so‘zlariga ko‘ra, NATO va Yevropaning rasmiy shaxslari Rossiya televideniyesi va internet saytlari orqali soxta xabarlar keng ko‘lamda tarqatilishi tufayli aziyat chekishmoqda hamda xavotirlanishmoqda.

Uning qo‘shimcha qilishicha, bunday ish bilan Sputnik va RT nashrlari shug‘ullanmoqda. Lungesku xonimning so‘zlariga ko‘ra fevral oyida ham Life portali dezinformatsiyaga (yolg‘on xabar tarqatish) qo‘l urdi. O‘shanda NATO Bosh kotibi Yyens Stoltenbergning o‘zini Ukraina prezidenti Petro Poroshenko sifatida ko‘rsatgan prankerlar Leksus va Vovan bilan gaplashgani haqida xabar berilgandi.

«Bunday muloqot hech qachon bo‘lmagan, bu dezinformatsiyaga yaqqol misol», — degan NATO vakili.

Kreml, Rossiya hukumati, Sputnik, RT va Life nashrlari Lungeskuning bu ayblovlariga munosabat bildirishmadi.