Trampning matbuot kotibi tashqi ko‘rinishi bilan e'tibor tortdi

Oq uyda 10 mart kuni matbuot uchun kundalik brifingni AQSh prezidenti Donald Trampning matbuot kotibi Shon Spayser olib bordi. Spayser kostyumi yoqasida qadalgan ko‘krak nishoni jurnalistlarning e'tiborini tortdi. Gap shundaki, Spayser AQSh bayrog‘i aks etgan nishonni "oyog‘ini osmondan" qilib qadab olgan bo‘lgan.

Spayser brifingni ishtirokchilardan biri unga tanbeh bermaguncha shu alfozda bir necha daqiqa davom ettirdi. 

"Hafta oxiriga ikki kun qoldi", deb bunga hazil javob qilgan Spayser va nishonini to‘g‘rilab qo‘ygan.

Ehtimol Oq uy vakili toliqqani sababli shunday e'tiborsizlikka yo‘l qo‘ygan bo‘lishi mumkin, biroq AQSh OAVda bundan "fil yasashga" va qandaydir sirli ishoralar ko‘rishga harakat qilingan.

Ijtimoiy tarmoq foydalanuvchilari esa Spayser shu tariqa "Kartadan yasalgan uy" serialining muxlisi ekanligini bildirib qo‘yishga harakat qilgan, deb taxmin qilishgan. Serialning logotiplaridan biri esa "oyog‘i osmondan qilingan" holda tasvirlangan AQSh bayrog‘i hisoblanadi.