Turkiya «Erdo‘g‘an o‘ldirilsin» banneri yuzasidan tekshiruv ishlarini boshladi

Istanbul shahri prokuraturasi Turkiya prezidentiga qarshi banner yuzasidan tergov ishlarini boshladi. Unda Rajab Toyyib Erdo‘g‘an suratiga qaratilgan pistolet hamda pastki qismida «Erdo‘g‘an o‘ldirilsin» so‘zlari yozilgan bo‘lgan, deb yozmoqda Hurriyet nashri.

Ta'kidlanishicha, banner Shveytsariyaning Bern shahrida Kurdiston Ishchi partiyasini qo‘llab-quvvatlash mitingi ishtirokchisi tomonidan osib qo‘yilgan. 

Tergov jarayoni «terrorchilik tashkilotini tashkil etishni tashviqot qilish», «terrorchilik tashkilotiga a'zolik» va «prezidentni tahqirlash» bo‘yicha olib borilmoqda. 

Yana bir tergov Shveytsariyaning o‘zida mahalliy prokuratura tomonidan boshlangan. Bern politsiyasi vakilining so‘zlariga ko‘ra, «jinoyat va zo‘ravonlikka oshkora da'vat» qilingani sabab surishtiruv ishlari boshlangan.

Politsiya vakilining qo‘shimcha qilishicha, huquq-tartibot idoralari bannerni ko‘rgan zahoti aksiya mobaynida uni qayta ochmasliklari uchun barcha choralarni ko‘rishgan, biroq hech kimni hibsga olmagan.