Antarktidadagi Qonli sharshara siri ma'lum bo‘ldi

Olimlar Qonli sharshara (Blood Falls) deb nomlangan bir asrlik javobi bo‘lmagan holat yechimini topishdi. U Antarktidadagi Teylor muzligidan oqib tushadi. Amerikalik olimlar tomonidan o‘tkazilgan va Journal of Glaciology’da e'lon qilingan yangi tadqiqot natijalari sizib chiquvchi qizil rangli suv muzlik ostidagi chuqurlikdan kelishi va “yoshi” million yildan ortiq ekanini ko‘rsatib berdi.

Sharshara shunisi bilan mashhurki, vaqti-vaqti bilan muzlikdan qizil suv oqa boshlaydi, bu esa uning tarkibida temir moddasi borligi bilan bog‘liq. Olimlar radar yordamida bu suv manbaini aniqlashga erishishdi. Shuningdek ma'lum bo‘lishicha, bu suv juda sovuq muzlikda ham suyuq holda saqlanib turishi mumkin, avval esa bu imkonsiz, deb hisoblangan.

«Qanchalik g‘ayritabiiy eshitilmasin, suv muzlaganida o‘z issiqligini beradi, hamda u o‘rab turuvchi sovuq muzni eritib yuboradi, - deya aniqlik kiritishdi ilmiy izlanma mualliflari. – Teylor muzligi suyuq suv oquvchi eng sovuq joy sanaladi».