Venetsiyada shaurmaga qarshi kurash boshlandi

Italiyaning Venetsiya shahri ma'muriyati shahar ko‘chalarida shaurma sotish bo‘yicha yangi savdo nuqtalari ochish hamda kesilgan pitssalar sotiluvchi umumovqatlanish joylari sonini chekladi. Buyuk Britaniyaning The Guardian nashri shu haqda yozmoqda. 

Shaurma sotuvchi yangi savdo nuqtalari ochishni taqiqlovchi qonun shu kunlarda kuchga kirgan bo‘lib, u shaharning madaniy merosini saqlashga qaratilgan. 

"Biz Venetsiya madaniy merosini saqlashga mos kelmaydigan faoliyat turlarini cheklash niyatidamiz", — degan shahar turizm departamenti rahbari Paola Mar.

Italiyaning qadimgi shaharlaridan biri bo‘lgan Venetsiya har yili millionlab sayyohlarni qabul qiladi. Bu esa, o‘z navbatida, shaharga kuchli ta'sir etadi. Shunga binoan, shahar ma'muriyati Venetsiyaning o‘ziga xosligini saqlab qolish uchun turli choralar ko‘rishga majbur bo‘ladi. Avvalroq, fast-fudlarni cheklash choralari Veron va Florentsiya shaharlarida ham joriy etilgan edi.