Venesuelada gvardiyachilar qo‘llagan gazdan bolalar va qariyalar jabr ko‘rdi

8 may kuni Venesuela milliy gvardiyasi Marakaybo shahrida namoyishchilarga qarshi ko‘zni yoshlatuvchi gazni qo‘llagan vaqtda maktablar, uylar va shifoxonalar ham gaz ta'siriga uchradi.

Ma'lum qilinishicha, shunday holatlardan birida gaz qo‘llangandan keyin aksilhukumat namoyishi ishtirokchilari bolalar va keksalar uchun mo‘ljallangan "Mening uyim" priyuti ichiga berkinib olishga urinishgan. Gvardiyachilar esa priyut binosiga kiraverishni gazli granatalar bilan o‘qqa tutishgan. Natijada gazdan priyutdagi ko‘plab bolalar va keksalar jabr ko‘rgan.

ABC telekanalining ma'lum qilishicha, ko‘ngillilar va qutqaruvchilar binolardan odamlarni shoshilinch evakuatsiya qilishlariga to‘g‘ri kelgan. Bolalar qo‘llarda, kasallar va qariyalar aravachalarda olib chiqilganlar.  

Shuningdek, ma'lum qilinishicha, 8 mayda Karakasda o‘tgan namoyishlarda kamida 116 kishi jarohat olgan.