«Rossiya Suriyadagi kimyoviy hujum qurbonlariga hurmatsizlik qildi»

Oq uyning ma'lum qilishicha, Rossiya Suriyadagi kimyoviy hujum qurbonlari hayotini qadrlamaydi, shu sababdan BMT Xavfsizlik Kengashida tergovlar bo‘yicha rezolyutsiyani bloklab qo‘ymoqda. Bu haqda AQSh prezidenti ma'muriyatining matbuot kotibi Sara Sanders bayonotida aytiladi.

Avvalroq Rossiya BMT-Kimyoviy qurolni taqiqlash bo‘yicha tashkilot qo‘shma missiyasining Suriyada kimyoviy hujumlarni tergov qilish bo‘yicha mandati uzaytirilishini bloklab qo‘ygandi.

«Rossiya Suriyada kimyoviy hujumlarni tergov qilish bo‘yicha mandatni uzaytirishga veto qo‘yib, kimyoviy hujumlar qurbonlari hayotini qadrlamasligi yoki bunday qurolning qo‘llanilishiga nisbatan xalqaro qoidalarning normal standartlarini hurmat qilmasligini ko‘rsatib berdi», - deya ta'kidlab o‘tgan Sanders.

Uning qo‘shimcha qilishicha, AQSh bu missiyani tiklashga harakat qilishda davom etadi.