BAAda binafsha rangli bulutlar kuzatildi

Birlashgan Arab Amirliklarining Milliy meteorologik xizmati eng shimoliy Ras-al-Hayma amirligida kuzatilgan binafsha rangli bulutlar videosini namoyish qildi. Ushbu holat 16 dekabrda momaqaldiroq vaqtida kuzatilgan.    

Meteorologik xizmat ma'lumotlariga ko‘ra, yomg‘irli ob-havo 18 dekabrgacha saqlanib qoladi.  

Mamlakatda oxirgi kunlar yog‘ingarchilik chaqirish uchun sun'iy ravishda bulutlar hosil qilinmoqda. Joriy yil boshidan 25 ta shunday operatsiya amalga oshirilgan.    

BAAda bulutlarni hosil qilish dasturi 1990-yillarda boshlangan. Maxsus samolyotlar muntazam ravishda bunday operatsiyalarni amalga oshirib keladi. Bulutlarni hosil qilish asosan mamlakatning shimoli-sharqidagi tog‘li hududlarda amalga oshiriladi. Ta'kidlanishicha, bu jarayonda bezarar kimyoviy moddalar qo‘llanadi.

BMTning prognoziga ko‘ra, 2030 yilga kelib dunyo aholisining yarmi suv yetishmasligidan aziyat chekadi.