Ming dollarlik tenderlarda to‘g‘ridan-to‘g‘ri shartnoma tuziladi

O‘zbekiston Respublikasi Vazirlar Mahkamasining 2017 yil 18 dekabrdagi «O‘zbekiston Hukumatining ayrim qarorlariga o‘zgartirish va qo‘shimchalar kiritish, shuningdek, ba'zilarini o‘z kuchini yo‘qotgan deb hisoblash to‘g‘risida»gi 992-sonli qarori qabul qilindi.

Vazirlar Mahkamasining «Tender savdolarini tashkil etishni takomillashtirish chora-tadbirlari to‘g‘risida»gi 2000 yil 21 noyabrdagi 456-son qaroriga o‘zgartirishlar kiritilmoqda. Jumladan, 5-bandda quyidagilar bayon etilmoqda:

«5. Tender savdolari 1000 ming AQSh dollariga teng miqdordan ortiq bitta kontrakt bo‘yicha tovarlar yetkazib berishni amalga oshirishda o‘tkaziladi.

Kamida 1 ming AQSh dollari summasidagi bir kontrakt bo‘yicha yetkazib berishda xarid tovarlar (ishlar, xizmatlar)ning narxi, sifati va yetkazib berish muddatlari bo‘yicha eng maqbul shartlarni yetkazib beruvchilar bilan to‘g‘ridan-to‘g‘ri shartnomalar tuzish yo‘li bilan amalga oshiriladi.

Bir ming AQSh dollaridan 100 ming AQSh dollarigacha bo‘lgan summaga bitta kontrakt bo‘yicha yetkazib berishda xarid:

- xarid qilingan tovarlar, ishlar va xizmatlarning tavsifnomasini, sonini, bajarish muddatini va tovarni yetkazib berish joyini ko‘rsatgan holda takliflarni yetkazib beruvchilarga yoki pudratchilarga yuborish;

- yetkazib beruvchilar yoki pudratchilar e'lon qilgan narxlar va tavsifnomalarni taqqoslash yo‘li bilan buyurtmachilar tomonidan tashkil etiladigan idoraviy tanlov komissiyalari tomonidan baholanadigan eng yaxshi takliflarni inobatga olish yo‘li bilan amalga oshiriladi».