Xitoy yuqori malakali mutaxassislarga uzoq muddatli vizalar bera boshladi

Xitoy hukumati 2018 yilning 1 yanvaridan yuqori malakali xorijliklar - ishbilarmonlar, olimlar, yangi texnologiyalar sohasidagi mutaxassislarni jalb qilish uchun uzoq muddatli vizalarni bera boshladi. BBC shu haqida xabar berdi. 

Agentlikning ma'lum qilishicha, bunday vizalar mamlakatga cheklanmagan marotaba 180 kunga kirish huquqini beradi. Ular 5 yildan 10 yilgacha muddatga beriladi. Vizani qo‘lga kiritgan chet ellik fuqarolar o‘zlari bilan birga oila a'zolari - turmush o‘rtoqlari va farzandlarini ham olib kelishlari mumkin. 

Manbada keltirilishicha, "yuqori malakali xorijiy iste'dodlar" toifasiga shuningdek Nobel mukofoti sovrindorlari, muvaffaqiyatli olimpiyachilar, "jahonga mashhur musiqiy va san'at universitetlari", shuningdek yirik moliyaviy tashkilotlarning rahbarlari ham kiradi. Xitoy hukumati umumiy hisobda 50 mingga yaqin mutaxassisni jalb qilishni mo‘ljallamoqda. 

Yangi vizaga buyurtmani internet orqali bepul yo‘llash mumkin. Tashqi ishlar vazirligi arizalarni qisqa muddatlarda qayta ishlashga va'da bermoqda.