Muz bilan qoplangan qoyalarning betakror manzaralari - Xuanshan

Xuanshan tumani YuNeSKO Jahon merosi ro‘yxatiga kiritilgan. Bu Xitoyning eng mashhur turistik maskanlaridan biridir. Qish faslida Xuanshan milliy parkiga borsangiz, ajib manzaraning guvohiga aylanasiz - muz bilan qoplangan qoyalar.

Bulutlar oralab

Xitoyning sharqiy qismidagi Anxoy provinsiyasida joylashgan Xuanshan ("Sariq tog‘lar") milliy parki o‘zining granit qoyalari va tepaliklari bilan mashhur. Ularning aksariyati 1000 metrdan oshadi va to‘g‘ridan-to‘g‘ri shu mintaqani qamrab oluvchi past bulutlarga tenglashadi. Osma granit devorlar orasida sharsharalar, g‘orlar va qaynoq manbalar "o‘z hayotini yashaydi".

Qish ertagi

Yoz oylarida tog‘ yo‘llari sayyohlar bilan to‘la bo‘ladi. Biroq qishning o‘rtalarida - harorat noldan past vaqtda kelsangiz, ushbu parkda yozda ko‘rishning iloji bo‘lmagan misli ko‘rilmagan go‘zallikni kashf etasiz.

Tabiiy fenomen

Qish oylarida tumandagi suv tomchilari kristallanib, qoyalar muzlab qoladi, ko‘z oldingizda muz qatlamlari bilan qoplangan oppoq qoyalar namoyon bo‘ladi. Ushbu tabiat hodisasi odatda havo harorati Tselsiy bo‘yicha 2-10 daraja sovuq bo‘lganda ro‘y beradi.

Nam va tumanli hudud

1990 yildan buyon YuNeSKO Jahon merosi ro‘yxatiga kiruvchi Xuanshan hududi juda nam hisoblanadi. Yozda bu yerda oyiga 300 mm yog‘ingarchilik qayd etiladi. Qishda bu yerda qor bo‘ronidan keyin bir necha kun mobaynida quyuq tuman saqlanib qolib, qoyalarda o‘ziga xos muz qobig‘i hosil bo‘lishi uchun sharoit yaratadi.

"Muzli zirx"

Daraxtlar va granit qoyalarni qoplab oluvchi muz vaqt o‘tishi bilan ularda qalin qatlamni hosil qiladi. Shiddatli shamol daraxtlarning tana va shoxlarini "muzli zirx"da qoldirib, tumanni haydaydi.

Qoyadagi qarag‘ay

Ehtimol, bunday muzlash tog‘li hududlar uchun noyob hodisa emasdir, biroq osma qoyalardan chiqib turuvchi qarag‘aylarni faqat shu yerda, Sharqiy Xitoyda ko‘rish mumkin. Xuanshan qarag‘ayi o‘tkir, qoya tepaliklarda o‘sadi. Uning egri tanasi asrlar davomida xitoylik rassom va shoirlarga ilhom baxsh etib kelgan shusiz ham dramatik manzaraga yanada ajoyib ko‘rinish beradi. Taxminlarga ko‘ra, Hollivudning "Avatar" filmini suratga olishda aynan shu yer ilhom baxsh etgan.

Samo tog‘lari o‘lkasida

VIII asrda ijod qilgan xitoylik shoir Li Bo "Xuanshan tongi" she'rida shunday yozgan: "Daraxtlar shoxlariga quyosh o‘z nurlarini socha boshladi - shu yerda, samo tog‘lari o‘lkasida. Xitoyliklar, uyg‘oning!" Li Bo tasvirlayotgan manzara hozir ham xuddi yuzlab yillar avvalgidek hayratimizni oshiradi, ayniqsa, tog‘lar va daraxtlar muz bilan qoplangan ajib mavsumda.