Qashqadaryoda qo‘lbola issiqxonalar bilan prezidentga ko‘zbo‘yamachilik qilindi

Qashqadaryo viloyatiga safar qilayotgan KUN.UZ sayti ijodiy guruhi noodatiy manzaralarga guvoh bo‘lishdi. Viloyatda bir kunlik issiqxonalar bilan prezidentga ko‘zbo‘yamachilik qilingan.

Sayt tahririyatiga qashqadaryoliklar tomonidan viloyatdagi yo‘llar yoqalarida prezident tashrifi arafasida vaqtinchalik issiqxonalar qurilgani, endi bu «issiqxonalar» qarovsiz yotgani haqida xabar berishgandi.

Ijodiy guruh shunday tut novdalari va sellofandan qurilgan qo‘lbola issiqxonalardan birini borib ko‘rdi va murojaatdagi ma'lumotlar tasdiqlandi - xo‘jako‘rsinga, shu bilan birga vaqt, mablag‘ va kuch sarflab barpo qilingan issiqxonalarda limon ko‘chatlari qovjiray boshlagan.

Qayd etish kerakki, viloyat bo‘ylab bunday issiqxonalar bir qancha joyda qurilgan.

Eslatib o‘tamiz, O‘zbekiston prezidenti Shavkat Mirziyoyev 28-29 yanvar kunlarida Qashqadaryo viloyatida bo‘lgandi.