Bosh prokuratura aksiyalarga bog‘liq firibgarlikni fosh etdi

Bosh prokuratura huzuridagi Departamentning Mirzo Ulug‘bek tuman bo‘limi xodimlari tomonidan o‘tkazilgan tergovga qadar tekshiruv davomida, fuqaro O. o‘zini O‘zbekiston Respublikasi Davlat statistika qo‘mitasida ishlashini aytib, “O‘zpaxtasanoat” AJning aksiyalarini tovar-xomashyo birjasidan olib berishni va'da qilib, fuqaro J.dan 12 000 AQSh dollarini firibgarlik yo‘li bilan olib, o‘zining ehtiyojlari uchun ishlatib yuborganligi aniqlangan.

Bu haqda mahkama matbuot xizmati xabar bermoqda.

Qayd etilishicha, mazkur holat yuzasidan fuqaro O.ga nisbatan O‘zbekiston Respublikasi Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

Eslatib o‘tamiz, avvalroq Bosh prokuratura GM-Uzbekistan’ga 1400 dollar evaziga ishga kiritib qo‘yishni va'da qilgan shaxs ushlangani haqida ma'lum qilgandi.