Makkada O‘zbekistonning ziyorat turizmi masalalari muhokama qilindi

Makkadagi "Abroj Al-Hidoya" mehmonxonasida O‘zbekiston musulmonlar idorasining Saudiya Arabistonidagi hamkori "Al-Hidoya" va Indoneziyaning "Burxon Al-Hidoya" kompaniyalari vakillarining uchrashuvi bo‘lib o‘tdi. Unda Umra vaqtida indoneziyalik ziyoratchilarning O‘zbekistonning qadimiy shaharlariga safarini tashkillashtirish masalalari muhokama qilindi. Bu haqida Musulmonlar idorasi rasmiy veb-portalida xabar berildi.

Tadbirda O‘zbekiston musulmonlar idorasi raisi, muftiy Usmonxon Alimov va Vazirlar Mahkamasi qoshidagi Din ishlari bo‘yicha qo‘mita raisi o‘rinbosari Nuriymon Abulhasan va hamkor kompaniyalar rahbarlari ishtirok etishdi.

Prezidentning 2016 yil 2 dekabrdagi O‘zbekiston Respublikasida turizm sanoatini tezkor rivojlantirishni ta'minlashga doir chora-tadbirlar to‘g‘risidagi farmoniga muvofiq, respublika hukumati ziyorat turizmidagi xizmatlarni yaxshilash, mehmonlarning mamlakatimizga tashrifi chog‘ida qulay shart-sharoitlarni ta'minlash, oziq-ovqat mahsulotlari va xizmatlarga "halol" sertifikatini kiritish, turizm sanoatida xorijiy investorlar uchun imtiyozlar va preferensiyalar berish bo‘yicha qator choralar ko‘rmoqda.

Bundan avval KUN.UZ'da Saudiya Arabistonining Ar-Riyod shahrida O‘zbekistonning sayyohlik salohiyati namoyish etilgani hamda Toshkent-Jidda-Toshkent yo‘nalishidagi aviareyslarning yo‘lga qo‘yilishi haqida xabar berilgan edi.