AQShda eng zamonaviy F-35B qiruvchisi falokatga uchradi

AQShning 5-avloddagi F-35B qiruvchi samolyoti Janubiy Karolina shtatida falokatga uchradi. Bu haqda AQSh dengiz piyoda qo‘shinlari korpusi matbuot xizmati va Byufort okrugi sherifi ma'lum qildi.

Ta'kidlanishicha, voqea 28 sentabrda mahalliy vaqt bilan soat 11:45da Greys-Xill tumanida yuz bergan. Sherifning ta'kidlashicha, uchuvchi katapulta qilishga ulgurgan va hozirda shifokorlar nazoratida qolmoqda. Bu hodisa ushbu samolyotning ilk falokati bo‘lgan.

Falokat samolyot Afg‘onistonda ilk bor jangovar vaziyatda qo‘llangan kunning ertasiga yuz berdi. Pentagon samolyotning ilk jangovar parvozi o‘tkazilganini va terrorchilarning pozitsiyalariga muvaffaqiyatli zarba berganini tasdiqlagandi.

Tvitterda ushbu hodisaning videosi joylashtirilib, unda dastlab F-35’lardan birining Essex desant kemasidan parvoz qilayotgani, so‘ngra uning palubaga vertikal qo‘nishni amalga oshirayotgani ko‘rsatilgan.  

F-35 5-avloddagi qiruvchi-bombardimonchi samolyotlar oilasi bo‘lib, uning uchta modifikatsiyasi mavjud. Samolyot AQShdan tashqari bir qator boshqa ittifoqdosh davlatlar qurollanishida kam miqdorda turadi. Samolyotni, jumladan, Turkiya sotib olmoqchi bo‘lgan, biroq AQSh hukumati bu dasturni Anqara Rossiyaning S-400 majmualarini sotib olmoqchiligi sababli muzlatib qo‘ydi. 

F-35B samolyotning vertikal qo‘na oladigan yagona modifikatsiyasi hisoblanadi.