AQSh Shimoliy Koreyaga qarshi sanksiyalarni bekor qilmaydi 

AQSh Shimoliy Koreya to‘liq yadroviysizlanmaguncha unga nisbatan sanksiya rejimini qat'iyan qo‘llab-quvvatlaydi. Bu haqda 2 oktabrda AQSh davlat departamenti vakili Xizer Nauert ma'lum qildi.      

Uning ta'kidlashicha, AQShning bunday siyosati bilan Xitoy va Rossiya rozi, biroq bu davlatlar ushbu masalada “yanada ko‘prog‘ini qilishlari mumkin edi”. 

“Bu masalani Xitoy, Rossiya, istalgan boshqa davlat bilan muhokama qilish uchun imkoniyat bo‘lgan har gal to‘liq va yakuniy yadroviysizlanishni ko‘rmagunimizcha bu sanksiyalarni saqlab qolish haqida gaplashamiz”, deb aytgan Nauert. 

Uning ta'kidlashicha, AQShning siyosati o‘zgarmagan va u Shimoliy Koreyaga maksimal bosim o‘tkazishni qo‘llab-quvvatlashdan iborat. Shu bilan birga davlat departamenti vakilining ta'kidlashicha, ikki davlat yetakchilari o‘rtasida yakuniy maqsadga erishishda yordam berishi mumkin bo‘lgan yaxshi munosabatlar o‘rnatilgan.