Mamayev va Kokorin do‘pposlagan mulozimlar orden bilan mukofotlandi

Rossiya prezidenti Vladimir Putin aka-uka Kokorinlar va Pavel Mamayev tomonidan do‘pposlangan mulozimlarni davlat mukofotlari bilan taqdirladi.

Minpromtorg departamenti direktori Denis Pak «Vatan oldidagi xizmatlari uchun» ordeni, «NAMI» tashkiloti bosh direktori Sergey Gaysin Aleksandr Nevskiy ordeni bilan mukofotlandi.

Minpromtorg va «NAMI» prezident korteji va Aurus-41231SB «Senat» xizmat mashinasini loyihalashtirish bilan shug‘ullangan edi. Unga 12 milliard rubldan ortiq mablag‘ sarflandi. Putin may oyida o‘tkazilgan inauguratsiya marosimiga ilk marotaba shu mashinada kelgan edi.

Eslatib o‘tamiz, 8 oktabr kuni aka-uka Kokorinlar va Mamayev Moskvadagi qahvaxonalardan birida Minpromtorg mulozimi Denis Pak va «NAMI» tashkiloti rahbari Sergey Gaysinni do‘pposlashgan edi. Bu mojarodan biroz oldin esa «Perviy kanal» boshlovchisi Olga Ushakovaning haydovchisiga hujum qilishgan. Jabrlanganlar turli tan jarohati olib, shifoxonaga yotqizilgan. Bu ish yuzasidan Moskva politsiyasi 213-modda (Bezorilik) bo‘yicha jinoyat ishi ochdi va ishtirokchilarni hibsga oldi. Aybdorlarga 7 yillik qamoq jazosi tahdid solmoqda.