Litvada qahrabodan qurilgan dunyodagi ilk hammom ochildi

Litvaning Palanga shahridagi Atostogų parkas sog‘lomlashtirish markazida to‘laligicha qahrabodan qurilgan hammom ochildi, deb yozadi Delfi. Nashrning ma'lumot berishicha, maydoni 22 kvadrat metrli xonani bezatish uchun uch tonna qimmatbaho tosh ishlatilgan.

Xabar qilinishicha, bu hammom nafaqat hayrat uyg‘otadi, balki salomatlik uchun juda foydali hamdir. Ma'lum bir haroratgacha qizdirilgan qahrabo moddalar almashinuvini yaxshilashga yordam beradigan qahrabo kislotasini ajratib chiqaradi. Bundan tashqari, ushbu xonada hammom qabul qilish asablarni tinchlantiradi va stressni yo‘qotadi.

Hammom ichida 45–48 darajadagi harorat saqlanadi. Mutaxassislar xonada yarim soatdan ortiq bo‘lmaslikni tavsiya etishmoqda.  

Xabar qilinishicha, hammomga tushish narxi 3 yevro atrofida. Ammo qahrabo xonaga kirish uchun avval majmuaga 14 yevro to‘lab kirish lozim bo‘ladi.