Turkiyada Rossiya elchisining o‘ldirilishi bo‘yicha ish yuzasidan sud boshlandi

Anqaraning alohida og‘ir jinoyatlar bo‘yicha ikkinchi sudi Rossiyaning Turkiyadagi elchisi Andrey Karlov o‘ldirilishi bo‘yicha ish yuzasidan ilk eshituvni boshladi. Bu haqda RIA «Novosti» xabar qilmoqda.

Ayblanuvchilar kursisida 18 kishi bor, ulardan to‘rt nafari Turkiyaning turli mintaqalaridagi qamoqxonalardan jonli translyatsiya orqali ishtirok etmoqda.

Sud jarayoni Adliya saroyi zalida bo‘lib o‘tyapti.

Avvalroq, Turkiyada elchi Karlovning o‘ldirilishi bo‘yicha ish yuzasidan tergov yakunlaganligi xabar qilingandi.

Andrey Karlov 2016 yil 19 dekabrda Anqaradagi fotoko‘rgazma ochilishida otib o‘ldirildi.

Hujum politsiya xodimi, tadbirda elchini qo‘riqlash bilan shug‘ullangan Mavlud Oltintosh tomonidan sodir etildi. U keyinchalik huquq-tartibot idoralari xodimlari bilan otishmada yo‘q qilingan.