Tramp Google’ni xitoylik harbiylarga yordam berishda aybladi

AQSh prezidenti Donald Tramp AQShning Google kompaniyasini Xitoy harbiylariga yordam berishda aybladi. 

“Google AQShga emas, Xitoy va ularning harbiylariga yordam bermoqda. Yaxshi yangilik shundaki, ular Trampga emas, qallob Xillari Klintonga yordam berishgan. Xo‘sh, bularning barchasi nima bilan yakunlandi?”, deb yozgan Tramp tvitterda.

Tramp shu tariqa Klintonning 2016 yilgi prezident saylovlaridagi mag‘lubiyatiga ishora qilgan.

14 mart kuni Pentagonda Google’ning Xitoy bilan hamkorlik qilishi bo‘yicha xavotir bildirilgan. AQSh shtablari boshliqlari birlashgan qo‘mitasi raisi general Jozef Danford kongressdagi nutqida “Google Xitoyda olib borayotgan ishlar xitoylik harbiylarga foyda keltirayotganini” aytgan. O‘z navbatida mudofaa vaziri vazifasini bajaruvchi Patrik Shenaxan Xitoy AQSh kompaniyalaridan texnologiyalarni o‘g‘irlash bilan shug‘ullanishi, Google esa AQSh mudofaa vazirligi dasturlarini qo‘llab-quvvatlash uchun “yetarlicha istak” bildirmayotganini ta'kidlab o‘tgan.