Rossiyada Mercedes-Benz’ning ilk zavodi ochildi

Moskva viloyatida yengil avtomobillar ishlab chiqaruvchi yangi korxona “Moskoviya” o‘z faoliyatini Rossiya bozori uchun Mercedes-Benz E-Class sedanini ishlab chiqarish bilan boshladi. Keyinroq krossoverlar ishlab chiqarilishi yo‘lga qo‘yiladi.

Zavodga sarmoyalar 250 mln yevroga yaqinni tashkil qilgan. Korxona mingga yaqin mutaxassisni ish bilan ta'minlaydi.

Mercedes-Benz’da zavod 4-sanoat inqilobiga xos yechimlar asosida qurilganidan faxrlanishlari aytilgan. Jumladan, bu yerda avtomobillar kuzovlari sexlar orasida haydovchisiz tashuvchilar yordamida harakatlanadi, qog‘ozsiz hujjat yuritish, ekologik toza elektr yuklagichlar, lak-bo‘yoq qoplamasida suvda eruvchi materiallarning qo‘llanishi yo‘lga qo‘yilgan.

“Yesipovo” sanoat parkida joylashgan zavod 2 yildan kamroq vaqt ichida qurib bitkazilgan.

Konveyyerga birinchi bo‘lib E-Class sedani qo‘yilgan. Kompaniyada bu holat ushbu modelga talab kattaligi bilan tushuntirilgan.   

Zavodning ochilishida Rossiya prezident Vladimir Putin ishtirok etgan. Putinning o‘z nutqida ta'kidlab o‘tishicha, zavodda yiliga 4 ta modifikatsiyada 25 mingta mashina ishlab chiqariladi.