AQShda fuqarolikni olish testi murakkablashtiriladigan bo‘ldi

AQShda migrantlar uchun fuqarolikni olish testlari o‘zgartiriladi. Endi migrantlarning AQSh tarixi, hukumati faoliyati va qadriyatlari haqidagi bilimlari yaxshiroq tekshiriladi.

AQSh fuqarolik va immigratsiya xizmatida ma'lum qilinishicha, joriy test fuqarolikni olishga da'vogarning bo‘lg‘usi fuqaro sifatida o‘z huquqlari va burchlari bo‘yicha bilimini aniq baholashni kafolatlaydigan qilib o‘zgartiriladi. 

Testni o‘zgartirish bo‘yicha ishlar 2018 yilda boshlangan, joriy kuzda uning so‘zlashuv qismiga o‘zgartirishlar kiritilgan dastlabki versiyasi sinovdan o‘tkazilishi rejalashtirilgan. Test 2020 yil oxiri yoki 2021 yil boshiga joriy qilinmoqchi.

Avvalroq AQSh prezidenti Donald Tramp AQShda yashovchi barchaning fuqaroligini bilmoqchiligini ma'lum qilgandi. U bu maqsadda barcha federal boshqarmalarga savdo vazirligi so‘roviga ko‘ra AQSh hududidagi u yoki bu fuqarolikka ega odamlar haqida ma'lumotni taqdim qilish majburiyatini yuklamoqchi.