FIFA «Bunyodkor»ning «Anji» ustidan bergan da'vosini rad qildi

Nizolarni hal qilish bo‘yicha FIFA palatasi «Bunyodkor»ning «Anji» klubi ustidan bergan shikoyatini qanoatlantirmadi.

Bu haqda Rossiya klubining manfaatini himoya qiluvchi SILA huquqiy agentligi xabar berdi.

Gap shundaki, 2018 yil boshida «Bunyodkor» yarimhimoyachisi Doston Hamdamov «Anji»ga o‘tgan edi. Biroq, Maxachqal'a klubi uning transferi uchun pul to‘lamadi. Natijada «Bunyodkor» «Anji» ustidan FIFA Nizolarni hal qilish palatasiga arz qildi.

«Bunyodkor» klubi da'vosiga ko‘ra, «Anji» Hamdamovning shartnomasida ko‘rsatilgan 300 ming yevro miqdoridagi tovon pulini to‘lashi shart edi. 

Ammo FIFA tashkiloti o‘tkazgan surishtiruvda «Bunyodkor» klubining Doston Hamdamov bilan imzolagan shartnoma shartlarini buzgani, bundan tashqari, futbolchidan qarzi borligi aniqlangan. Natijada, Hamdamovning erkin agent maqomida «Anji»ga bepul o‘tgani qoidaga zid emas deb topilgan va «Bunyodkor» da'vosi rad qilingan.

Eslatib o‘tamiz, Doston Hamdamov 2018 yil davomida «Anji» tarkibida atigi 11ta o‘yinda maydonga tushdi. 2019 yilda esa «Paxtakor» bilan shartnoma imzoladi.