Sherzod Shermatov: «Xususiy maktablarga o‘gay boladek qaralgan»

Unda xalq ta'limi vaziri Sherzod Shermatov ta'lim sohasidagi o‘zgarishlar haqida gapirdi.

“Xususiy maktablarga “o‘gay boladek” qarab kelingan. So‘nggi 3 yil ichida xususiy maktablar oldidagi barcha to‘siqlar olib tashlandi. Oddiy bir misol: litsenziya olish masalasi. [Ilgari] Vazirlar Mahkamasidan olinardi. Hozir hujjat topshirib, istalgan Davlat xizmatlari markaziga borib, litsenziya olinadi. Shu paytgacha xususiy maktablarning birortasi attestat bermagan, hozir xususiy maktablar davlat maktablari kabi attestat bera oladi. Bu sohaga raqobat kirib kelib, sohada ham rivojlanish boshlanadi”, – dedi Shermatov.

Uning so‘zlariga ko‘ra, Xalq ta'limi vazirligi Osiyo taraqqiyot banki bilan Sergeli tumanida davlat-xususiy sherikchilik asosida yangi maktablarni qurish bo‘yicha loyiha boshlagan.

Sherzod Shermatov yildan yilga oliy ta'limda kirish kvotasi oshirilishi haqida gapirib, bu qulay imkoniyat ekanini ta'kidladi.

“Bu imkoniyatdan yaxshiroq foydalanish uchun joriy yildan variativ o‘quv rejalari joriy qilindi. Masalan, [o‘quvchi] muhandislik yo‘nalishiga tayyorlanadigan bo‘lsa, muhandislik bo‘yicha fanlarni, shifokorlik yo‘nalishiga bo‘lsa, kimyo, biologiya fanlarini ko‘proq o‘qiydi”, - deya qo‘shimcha qildi u.