Amerikalik senator koronavirusdan sog‘aygach shifoxonada ishlay boshladi

Amerikalik senator Rend Pol koronavirusdan sog‘aygach, shifoxonada ko‘ngilli bo‘lib ishlay boshladi.

Foto: AP /Carolyn Kaster

Kentukki shtatidan respublikachi-senator bo‘lgan Pol bu haqda tvitterda ma'lum qilgan. Siyosatchi, shuningdek, hammaga qo‘llab-quvvatlov uchun minnatdorlik bildirgan.

“Meni yana koronavirusga tekshirishdi, natija – manfiy”, deb ta'kidlab o‘tgan Pol.

Uning ta'kidlashicha, u muhtojlarga, jumladan koronavirusga chalinganlarga yordam berish uchun shifoxonalardan birida ko‘ngilli bo‘lib ishlay boshlagan.

“Birgalikda biz yenga olamiz!”, deb aytgan senator.

Rend Polning kasallikka chalingani 23 martda ma'lum bo‘lgan.

Avvalroq Irlandiya bosh vaziri Leo Varadkar koronavirus pandemiyasiga qarshi kurashda tibbiyotchilarga yordam berish uchun haftada bir marta shifokor bo‘lib ishlashga qaror qilgani ma'lum qilingandi.