Nyu-Yorkda koronavirusga tahlilni bevosita dorixonalarda topshirish mumkin bo‘ladi 

Tegishli farmonni shtat gubernatori Endryu Kuomo imzolagan. Umumiy hisobda yangi farmon bilan 5 mingga yaqin mahalliy dorixona qamrab olinadi. 

Hozirda shtatda har kuni 20 mingga yaqin odam koronavirusga tahlillar topshirmoqda. Virus bor-yo‘qligini tekshirish joylarining ko‘payishi hisobiga Kuomo kuniga topshiriladigan testlar miqdorini 40 minggacha yetkazmoqchi.

“Bizda tahlillar yig‘ish joylari ko‘paygani sababli, o‘zini tekshirtirmoqchi bo‘lganlarga talablarni kamaytirishimiz mumkin bo‘ladi”, deb aytgan gubernator.

Uning farmoniga ko‘ra, sog‘liqni saqlash sohasi xodimlari, politsiyachilar, o‘t o‘chiruvchilar, jamoat transporti haydovchilari va do‘konlar xodimlari o‘zlarida koronavirus alomatlari bo‘lmasa-da, unga tahlil topshira olishlari mumkin bo‘ladi.

Ayni vaqtda shtatda koronavirusga chalinganlar soni mamlakat bo‘ylab eng yuqori bo‘lib, 282 mingdan ko‘proqni tashkil qilmoqda, 16599 kishi koronavirusdan vafot etgan. Umumiy hisobda AQSh bo‘yicha koronavirusga chalinganlar soni bir millionga yaqinlashib qoldi, 580 mingdan ko‘proq odam undan vafot etgan.