Foto: Minneapolisdagi namoyishlar

Floydning o‘limiga aloqador bo‘lgan 4 nafar politsiyachi ishdan bo‘shatildi, ulardan biri, qo‘lga olish vaqtida tizza bilan bo‘g‘ish usulini qo‘llagan Derek Shovin qo‘lga olingan. Ammo jamoatchilik va marhumning qarindoshlari ushbu politsiyachilarning barchasiga qotillik bo‘yicha jinoiy ish ochilishini talab qilib ko‘chalarga chiqqan.

Minneapolisda minglab namoyishchilar ko‘chaga chiqdi: binolarga o‘t qo‘yildi, jumladan politsiya mahkamasiga ham. Politsiya bilan to‘qnashuvlar davom etmoqda.

 Namoyishlar internetda 46 yoshli Jorj Floyd politsiya ofitseri tomonidan qiynoqqa solingani tasvirlangan video tarqalgach boshlandi. 

Adolat talab qilib politsiya mahkamasiga kelganlar hujumga o‘tib tartibsizliklarni boshlab berishdi. 

Sent-Pol tumanida miting ishtirokchilari talonchilik va vandalizmga o‘tib ketishdi. Ayrimlar magistral yo‘lda avtomobil harakatini to‘xtatib qo‘yishdi. 

Gubernator Tim Uolz mahalliy amaldorlarga shaharda nazoratni ta'minlashda yordam berish uchun Milliy gvardiyani jalb qildi.

Namoyishchilar bu tartibsizliklar Floydning o‘limiga munosib javob ekaniga ishonishmoqda. 

Floydning o‘limi ro‘y bergan hududdagi ko‘plab binolar yoqib yuborildi.

 Munitsipalitet atrofida yig‘ilganlar shunday deyishmoqda: «Agar qotillik videoga yozib olingan bo‘lsa, nega qotillar hozir turmada emas?»

O‘nlab odamlar Target supermarketlari tarmog‘i do‘konlarini talashga harakat qilishdi, shundan so‘ng tarmoq rahbariyati shahardagi o‘nlab savdo nuqtalarini yopib qo‘ydi. 

Minneapolis hukumati xavfsizlik nuqtayi nazaridan metro liniyalari va avtobus marshrutlarini to‘xtatdi. 

Jorjning ukasi Filoniz Floyd o‘limga aloqador bo‘lgan politsiyachilar AQSh qonunchiligida nazarda tutilgan maksimal jazo - o‘limga hukm qilinishiga umid bildirmoqda. 

 Politsiya rahbari shahar aholisini xotirjamlikni saqlashga chaqirmoqda.