Boliviya mablag‘ tejash maqsadida Nikaragua va Erondagi elchixonalarini yopadi

Boliviya mablag‘larni tejash maqsadida Nikaragua va Erondagi elchixonalarini yopishga qaror qildi. Tejalgan mablag‘lar koronavirusga qarshi kurashga yo‘naltiriladi. Bu haqda mamlakatning vaqtinchalik prezidenti Janin Anes ma'lum qildi.

Foto: AP Photo / Juan Karita

“Hozirgi vaqtda tejamkorlik mamlakat uchun juda muhimdir. Elchixonalarning yopilishi qarori faqatgina iqtisodiy zarurat bilan bog‘langan. Shu maqsadda biz sport, madaniyat va aloqa vazirliklarini ham qisqartiramiz. Ularning majburiyatlari boshqa vazirliklarga o‘tadi. Endi mamlakatda 20 ta emas, 17 ta vazirlik bo‘ladi”, deb aytgan Anes.

Qayta tashkillashtirishdan tejaladigan barcha mablag‘lar sog‘liqni saqlash sohasiga yo‘naltiriladi.

Boliviyada koronavirusga chalinishning ilk holatlari 10 mart kuni qayd qilingan. Oxirgi ma'lumotlarga ko‘ra, mamlakatda 10 mingdan ko‘proq odam koronavirusga chalingan. Boliviyada karantin cheklovlari amal qilmoqda.