Apple o‘z qidiruv tizimini yaratish ustida ishlayotgani ma'lum bo‘ldi

Apple AQShda Google kompaniyasiga qarshi antimonopoliya ishi qo‘zg‘atilganligi bois o‘z qidiruv servisini yaratish ustidagi ishlarni kuchaytirdi, deb yozmoqda Financial Times.

O‘tgan haftada AQSh adliya vazirligi Google kompaniyasiga qarshi da'vo ochgandi. Unda kompaniyaning raqobat qonunini buzgan holda Apple qurilmalariga o‘z qidiruv tizimini o‘rnatish bo‘yicha kelishuvi qoralangan.

 Apple iOS 14 operatsion tizimi internetda Google yordamisiz ma'lumot qidirish imkonini beradi. Apple odatda o‘z rejalarini sir tutadi, ammo ushbu yangi funksiya kompaniya o‘z qidiruv tizimi ustida ishlayotganini anglatadi, deb yozadi FT.

 Apple 2018 yilda ilgari Google’da qidiruv yo‘nalishida rahbarlik qilgan Jon Jannandreani ishga olgandi. Jannandrea hozirda sun'iy ong texnologiyalarini rivojlantirish bilan shug‘ullanmoqda.

O‘z qidiruv tizimini yaratishi uchun bir necha yil kerak bo‘ladi, ammo Apple bu yil 55 mlrd dollardan ortiq daromad olishi hisobga olinsa, kompaniya uzoq muddatli investitsiyalarga qo‘l urishi mumkin, deya qayd etadi FT.