Indoneziyada yuz bergan zilzilada 3 kishi halok bo‘ldi

Zilzilalar G‘arbiy Sulavesi provinsiyasida qayd qilingan. Uning o‘chog‘i 10 km chuqurlikda bo‘lgan. 

“Moddiy zarar bor, jumladan “Maleo” mehmonxonasi va G‘arbiy Sulavesi gubernatori ofisiga zarar yetgan”, deb aytilgan xabarda.

Bundan tashqari, Mamujuda 62ta uy, tibbiy markaz va harbiy idoraga zarar yetgan. Uchta joyda ko‘chki yuz berib, Mamujuni Majyene bilan bog‘lovchi asosiy yo‘lni to‘sib qo‘ygan.  

Ma'lum qilinishicha, tibbiy markaz vayronalari ostida bemorlar va tibbiy xodimlar, jami 10ga yaqin kishi qolib ketgan. Hozirda ularni qutqarish bo‘yicha ishlar olib borilmoqda.

Ta'kidlanishicha, zilzila kuchli bo‘lgan, biroq 7 soniya davom etgan. Zilzila sunamiga olib kelmagan.

Indoneziya Tinch okeanidagi vulqonlar va tektonik plitalar tutashuv liniyalarini o‘z ichiga oluvchi “olovli halqa”da joylashgani sababli u yerda tez-tez zilzila yuz berib turadi.