Myanmada harbiylar Facebook’ni bloklashdi

Axborot va aloqa vazirligining bildirishicha, Facebook 7 fevralgacha bloklandi.

Foto: AFP

Myanmada hukumatni egallab olgan harbiylar Facebook ijtimoiy tarmog‘ini bloklab qo‘yishdi. Bu haqda Reuters xabar bermoqda.

Axborot va aloqa vazirligining bildirishicha, Myanmadagi 53 million nafar aholining teng yarmi foydalanadigan Facebook 7 fevralgacha bloklandi.

"Hozirda mamlakat barqarorligini buzayotgan odamlar bor... Ular Facebook’dan foydalanib yolg‘on va noto‘g‘ri xabarlar tarqatib aholini chalg‘ityapti", - deyiladi vazirlik bayonotida.

Shu bilan birga, mamlakatda ayrimlar VPN orqali ijtimoiy tarmoqqa kirish imkoniyatiga ega.

Avvalroq Myanmada harbiylar xalqaro aviaaloqani to‘xtatishgandi. Myanmar Times nashrining xabar berishicha, aviaaloqa 31 maygacha to‘xtatiladi.

Myanmada 1 fevralda harbiylar mamlakat boshqaruvini o‘z nazoratlariga olishdi. Shu kuni prezident Vin Min, hukmron partiya yetakchisi va mamlakat rahbari Aun San Su Chji hamda siyosiy rahbariyatning ko‘plab vakillari hibsga olingan. Bu 63 yil ichida mamlakatda amalga oshirilgan to‘rtinchi davlat to‘ntarishi hisoblanadi.

Tayyorlagan Дилшод Аскаров

#Facebook #Myanma

1 fevral kuni Myanmada harbiylar mamlakatning amaldagi rahbari Aung San Suu Kyini hibsga olib, hokimiyat armiya bosh qo‘mondoni Min Auing Hlaingga o‘tganini, bir yil davomida favqulodda holat rejimi amalda bo‘lishini e’lon qilishdi.