AQSh kuch bilan dunyoda demokratiyani ilgari surmaslikka va'da berdi

“Biz endilikda qimmatbaho harbiy amaliyotlardan foydalanib, demokratiyani ilgari surmaymiz. Shuningdek, biz avtoritar tuzumlarni kuch bilan ag‘darishga urinmaymiz”, deb aytgan Blinken davlat departamentidagi nutqi vaqtida. 

U AQSh o‘tmishda bunday usullarni qo‘llagani, biroq ular kutilgan natijani bermaganini tan olgan.

AQSh davlat kotibining aytishicha, Bayden ma'muriyati demokratiyani boshqa davlatlarga o‘rnak bo‘lgan hamda hamkorlarni demokratik o‘zgarishlar uchun rag‘batlantirgan holda ilgari surishga intilmoqda. 

Blinken nutqi davomida AQShning dunyo sahnasidagi bosh ustuvor vazifasi Rossiya yoki Eronga emas, balki Xitoyga qarshi turish hisoblanishini aytgan.

“Xitoy – joriy yuz yillikning eng yirik geosiyosiy muammosi”, deb ta'kidlab o‘tgan AQSh davlat kotibi. 

Blinkenning ta'kidlashicha, AQShda boshqa muammolar ham bor va ular, jumladan, Rossiya, Eron va Shimoliy Koreya bilan bog‘langan. “Biroq Xitoy solayotgan tahdid – bu mutlaq boshqa turdagi muammodir”, deb aytgan AQSh vakili.

Uning aytishicha, aynan Xitoyda dunyodagi hozirgi vaziyatni o‘z foydasiga o‘zgartirish uchun iqtisodiy, diplomatik, harbiy imkoniyatlar mavjud.