Myanmada namoyishchilarni tarqatish vaqtida 38 kishi halok bo‘ldi

Myanmada 14 mart kuni o‘tgan norozilik namoyishlarini tarqatish vaqtida 38 kishi halok bo‘ldi, yana 80ga yaqin kishi jarohat oldi. 

Myanma siyosiy mahkumlariga yordam uyushmasi ma'lumotlariga ko‘ra, mamlakatda fevral boshida hokimiyat tepasiga harbiylar kelgach va ularga qarshi ommaviy noroziliklar boshlangach, kamida 126 nafar namoyishchi halok bo‘lgan. Uyushmada ta'kidlanishicha, aslida qurbonlar ko‘proq bo‘lishi mumkin.    

Ayni vaqtga kelib  2156 kishi ushlangan, ulardan 1837 nafari hamon hibsda ushlab turilibdi. Ulardan 3 kishi qamoq jazosiga mahkum qilingan.

Hukumatning rasmiy ma'lumotlariga ko‘ra, 14 mart kuni namoyishlar vaqtida 23 kishi ushlangan. Biroq bu sonlar huquq himoyachilarining ma'lumotlaridan farqlanmoqda. Ularning ta'kidlashicha, bir kun davomida mamlakat bo‘ylab 100ga yaqin namoyishchi ushlangan. 

Myanma harbiylari 1 fevralda harbiy to‘ntaruv amalga oshirib, mamlakat rahbariyatini hibsga olgandi. To‘ntaruvdan keyin mamlakat bo‘ylab norozilik namoyishlari boshlangandi.