Yevropa ittifoqi hozircha vaksinalar bilan bo‘lisha olmasligi aytildi

Yevrokomissiya rahbari Ursula fon der Lyayyen hozirda Yevropa ittifoqi koronavirusga qarshi vaksinalarni nochor davlatlarga berishi uchun imkoniyat ko‘rmayotganini aytdi. Uning ta'kidlashicha, hozirda Yevropa ittifoqi davlatlarining o‘zi vaksinalarga ehtiyojmand.

Fon der Lyayyen Funke Media Gruppe nashriga bergan intervyusida Yevropa ittifoqi vaksinalarni xayriya qilishga imkoniyati bo‘lmasa-da, ular bilan bo‘lishish dasturi COVAX’ni moliyaviy qo‘llab-quvvatlayotganini eslatib o‘tgan. 

“Yevropa ittifoqi ushbu tashabbusga 2,2 mlrd yevro sarmoya qildi. COVAX hozirdayoq 52ta davlatga 30 mln doza vaksina yetkazib berdi”, deb qo‘shimcha qilgan Yevrokomissiya rahbari.

Uning ta'kidlashicha, Yevropa ittifoqining boshqa davlatlarga vaksinani bevosita xayriya qilish mexanizmi ittifoqning o‘zida vaksinalar bilan bog‘liq vaziyat yaxshilangandan keyingina yo‘lga qo‘yiladi.