Myanmalik harbiylar namoyishlar vaqtida 164 kishi halok bo‘lganini tan oldi

Myanmalik harbiylar mamlakatda namoyishchilar va xavfsizlik kuchlari xodimlari o‘rtasidagi to‘qnashuvlarda kamida 164 namoyishchi halok bo‘lganini tan oldi.

Foto: Reuters

Harbiylar vakili Zo Min Tun namoyishchilarning halok bo‘lganidan afsusdaligini, “chunki ular Myanma fuqarolari bo‘lganini” aytgan.

Uning ta'kidlashicha, to‘qnashuvlar vaqtida, shuningdek, xavfsizlik kuchlarining 9 xodimi halok bo‘lgan.

Biroq Myanmada siyosiy mahkumlarga yordam uyushmasi ma'lumotlariga ko‘ra, 1 fevraldan beri harbiylarga qarshi davom etayotgan namoyishlarda 250 kishi halok bo‘lgan.

Myanmada harbiylar 1 fevralda davlat to‘ntaruvi amalga oshirib, mamlakat rahbariyatini hokimiyatdan chetlatgandi.

Avvalroq Myanmada internet o‘chirib qo‘yilgani va gazetalar sotilishi taqiqlab qo‘yilgani ma'lum qilingandi. Jumladan, qo‘shni Tailand bilan chegaradagi optik-tolali internet kabellari uzib tashlangan. Shu sababli mamlakat ichidagi axborotni tekshirish tobora murakkablashib bormoqda.

#namoyishchilar #Myanma

1 fevral kuni Myanmada harbiylar mamlakatning amaldagi rahbari Aung San Suu Kyini hibsga olib, hokimiyat armiya bosh qo‘mondoni Min Auing Hlaingga o‘tganini, bir yil davomida favqulodda holat rejimi amalda bo‘lishini e’lon qilishdi.