Respublikadagi 66 foiz issiqlik tarmoqlari ta'mirtalab ahvolda – vazir o‘rinbosari

2020 yilda O‘zbekistondagi issiqlik ta'minoti korxonalari 345,2 mlrd so‘m zarar ko‘rgan bo‘lib, bu zararlar davlat budjeti tomonidan to‘liq qoplab berildi. Vazir o‘rinbosarining ta'kidlashicha, bugungi kunda respublikadagi mavjud 648ta qozonxonadan 495tasi faoliyat yuritmoqda, 153ta qozonxona nosoz holatdaligi aniqlangan.

 Bundan tashqari, mamlakatdagi jami issiqlik tarmoqlarining 2810 kilometri, ya'ni 66 foiz uzunlikdagi issiqlik tarmoqlari ma'nan va jismonan eskirgan, ta'mirtalab ahvolga kelib qolgan.

 «Mavjud eskirgan tizim va uskunalar energiya resurslarini ko‘p sarflashi, qozonxona uskunalarining foydali ish koeffitsiyentini pasayishiga, xarajatlarning esa me'yordan ortib ketishiga, natijada xizmatlar sifati va samaradorlik pasayishiga olib kelmoqda», deya uning so‘zlarini keltirmoqda Kun.uz muxbiri.