Guantanamo turmasidagi eng keksa mahbus ozod qilinadigan bo‘ldi

AQSh Guantanamo turmasida saqlanayotgan eng keksa mahbus – 73 yoshli pokistonlik Sayfulloh Parachani ozod qilishini e'lon qildi. Bu haqda Al Jazeera xabar berdi.

Parachaning advokati uning himoyasi ostidagi “Al-Qoida” bilan aloqalarda gumon qilinib, panjara ortida ushlanganini, biroq hech qachon unga biror jinoyatni sodir etish ayblovi qo‘yilmaganini ma'lum qilgan. Turmada 16 yil o‘tkazgan Paracha boshqa ikki mahbus bilan birga mahbuslarni nazorat qilish komissiyasi tomonidan oqlangan. Advokatning ta'kidlashicha, AQShning ushbu qarori Paracha AQSh uchun “boshqa xavf solmasligi”ga asoslangan.

Ma'lumotlarga ko‘ra, Paracha ko‘p yillar davomida Nyu-Yorkda yashagan va tadbirkorlik bilan shug‘ullangan. AQSh hukumati u “Al-Qoida”ning 2001 yil 11 sentyabrdagi teraktni uyushtirgan ikki terrorchiga moliyaviy operatsiyani o‘tkazishga yordam bergan “vositachisi” bo‘lganini ta'kidlagan. Parachaning o‘zi ushbu shaxslar “Al-Qoida”ga aloqador ekanini bilmaganini va terrorchilikka hech qanday aloqasi yo‘qligini aytgan.

Guantanamo turmasi AQShning Kubadagi harbiy-dengiz bazasida joylashgan bo‘lib, unda AQSh tomonidan turli jinoyatlarda, jumladan, terrorchilikda va dushman tomonda jang qilganlikda ayblanganlar saqlanadi.