Sirdaryo viloyati IIB boshlig‘i o‘zgardi

Sirdaryo viloyati Ichki ishlar boshqarmasiga yangi boshliq tayinlandi. Viloyat hokimligi matbuot xizmati xabar berishicha, Shuhrat Husanovich Bo‘ronov Sirdaryo viloyati Ichki ishlar boshqarmasi boshlig‘i lavozimida ish boshladi.

Polkovnik  Shuhrat Bo‘ronov muqaddam Surxondaryo viloyati IIB boshlig‘ining birinchi o‘rinbosari bo‘lgan, shu kunga qadar Samarqand viloyati IIB boshlig‘ining birinchi o‘rinbosari lavozimida ishlab kelayotgandi.

U yangi lavozimda Shavkat Mavlonovning o‘rnini egalladi. Shavkat Mavlonov 2019 yilning iyunida Ilhom Qutlimuratov o‘rniga Sirdaryo viloyati IIBga boshliq bo‘lgandi. Uning keyingi faoliyati haqida hozircha ma'lumot yo‘q.

• Eslatib o‘tamiz, Xotira va qadrlash kuniga bag‘ishlab o‘tkazilgan bayram tadbirlarida Sirdaryo viloyati harbiy blok rahbarlari, ya'ni DXX, prokuratura, IIB va bojxona xizmatlarining hududiy rahbarlari O‘zbekiston madhiyasi yangrayotgan vaqtda o‘zini qanday tutgani aks etgan videolar internetda tarqalgandi. Sirdaryo viloyati hokimi G‘ofurjon Mirzayevning ortida turgan harbiylar davlat madhiyasi yangray boshlashi bilan qanday jyest ko‘rsatishni bilmay shoshib qolishgan, ular avvaliga qo‘llarini bosh kiyimlariga qo‘ndirib harbiy chest berib turishgan, keyin esa qo‘llarini ko‘kraklariga qo‘yib turishgan, bu tushunmovchilik to‘rt harbiy ishtirokida bir necha marta takrorlangan va bu vaqt davomida kamera kulgili holatni yozishda davom etgandi.