Jizzaxda sodir bo‘lgan yo‘l transport hodisasi oqibatida «Nexia» yonib ketdi

Jizzax viloyati Zomin tumani hududida «Zil-138» yuk mashinasi bilan to‘qnashishi oqibatida «Nexia» to‘liq yonib ketdi. Bu haqda viloyat IIB tomonidan ma'lum qilindi.

Jizzax viloyati Zomin tumani hududidan o‘tgan Qo‘qon – Jizzax A- 376 yo‘lining 256- kilometrida «Nexia» «Zil-138» yuk mashinasi bilan to‘qnashgan. Oqibatda tumanning Beshyuz qishloq fuqarolar yig‘inida istiqomat qilgan B.O‘. boshqaruvidagi «Nexia» to‘liq yonib ketdi. Haydovchini avtoulovdan chiqarib olishning iloji bo‘lmagan va u voqea joyida hayotdan ko‘z yumdi.

Ko‘ngilsiz hodisaga haydovchining uxlab qolishi natijasida «Nexia»ning «Zil-138» yo‘liga chiqib ketishi sabab bo‘lgani bildirilmoqda. Holat yuzasidan jinoyat ishi qo‘zg‘atildi.

Avvalroq, Jizzax viloyatida sodir bo‘lgan yo‘l transport hodisalarining 33 tasi haydovchilarning uxlab qolishi tufayli yuz bergani ma'lum qilingan edi.