Navoiyda 5 nafar qochoq ota bir kunda topildi

Ma'lum qilinishicha, fuqarolik ishlari bo‘yicha Navbahor va Karmana tumanlararo sudlarining ijro hujjatlariga asosan javobgarlar I.Ya., Z.R., S.N., Sh.Ye. hamda S.B.dan farzandlarining moddiy ta'minoti uchun aliment undirish belgilangan. MIB Navbahor tuman bo‘limi davlat ijrochilari tomonidan shu kunga qadar ijro harakatlari olib borilgan.

Ammo mazkur qarzdor otalar ogohlantirilishiga qaramasdan doimiy ravishda yashash manzilini o‘zgartirib, aliment to‘lashdan bo‘yin tovlab kelgan. Buning oqibatida ularning jami qariyb 40 million so‘m qarzdorligi yig‘ilib qolgan.

Davlat ijrochisi tomonidan ushbu otalarga nisbatan qidiruv e'lon qilish haqida qaror qabul qilingan. Olib borilgan qidiruv harakatlari natijasida qochoq otalar bir kunda topilgan. Jinoyat ishlari bo‘yicha Navbahor tuman sudi tomonidan ularga nisbatan 15 sutkadan ma'muriy qamoq jazosi tayinlangan. 

Oldinroq Navoiyda xorijga chiqishiga taqiq qo‘yilgan ota 32,4 million so‘m aliment to‘lagandi.