Vashingtondagi Kapitoliy binosi haydovchining tahdididan keyin o‘rab olindi

Politsiya pikap minalashtirilgan bo‘lishi mumkinligi haqida xabarlar olgach, odamlarni evakuatsiya qila boshlagan. Politsiyachilar mashina haydovchisi qo‘lida detonatorga o‘xshash buyum ko‘rishgan, biroq keyinroq bu axborot tasdiqlanmagan.

Kapitoliy politsiyasi boshlig‘i Tom Menger brifingda gumonlanuvchi haqida axborot bergan. Hozircha haydovchining motivlari noma'lum, biroq vaziyatni tinch hal qilish uchun u bilan muzokaralar olib borilmoqda. Voqea joyiga snayperlar yuborilgan. 

Ma'lumotlarga ko‘ra, davlat raqami bo‘lmagan pikap mashinasi kutubxona yonida soat 9:15 da to‘xtagan. Haydovchi uning yoniga kelgan politsiyachiga mashinasida bomba va detonator borligini hamda hammayoqni portlatishini aytgan.

Bir nechta politsiyachi mashinada portlovchi qurilmaga o‘xshash hech narsa ko‘rishmaganini aytishgan. Ularning ta'kidlashicha, politsiya hozircha haydovchining tahdididan kelib chiqib ish ko‘rmoqda.

Kongressdagi ba'zi xodimlarning ta'kidlashicha, dastlab ularga ko‘chaga chiqmaslik va o‘z xonalarida qolish aytilgan. Ma'lum qilinishicha, joriy haftada Kapitoliyda kongressmenlar yo‘q.