Superkontraktning minimal miqdorlari belgilandi

Oliy va o‘rta maxsus ta'lim vazirligi matbuot xizmati bakalavriat ta'lim yo‘nalishlari bo‘yicha tabaqalashtirilgan to‘lov-kontraktning minimal miqdorlari (superkontrakt) tasdiqlangani (PDF) haqida xabar qildi.

«Superkontraktning minimal miqdorlari 2021/2022 o‘quv yili qabulida bakalavriat ta'lim yo‘nalishlariga kirish imtihonlari natijalariga ko‘ra to‘plagan ballari tasdiqlangan to‘lov-kontrakt doirasidagi qabul parametrlari chegarasiga 4,05 balldan ortiq yetmagan, 56,7 balldan kam bo‘lmagan holda, qo‘shimcha ravishda o‘qish istagini bildirgan abituriyentlarning birinchi o‘quv yili uchun amalda belgilangan bazaviy to‘lov-kontrakt miqdorlariga nisbatan olingan», deyiladi vazirlik xabarida.

Shuningdek, superkontraktlarning minimal miqdorlarini hisoblashda 2021/2022 o‘quv yili uchun amalda belgilangan bakalavriat ta'lim yo‘nalishlari bo‘yicha bitta talabani to‘lov-kontrakt shaklida stipendiyasiz bazaviy to‘lov-kontrakt bo‘yicha o‘qitish qiymati qo‘llanilishi va koronavirus infeksiyasiga qarshi emlangan (vaksina olgan) abituriyentlarga belgilangan tabaqalashtirilgan to‘lov-kontraktning minimal miqdoriga 10 foizli chegirma berilishi belgilangan.

Super-kontraktda 0,05 ball uchun yengillik berildi

Joriy yilda istisno tariqasida super-kontrakt miqdorini arzonlashtirilgan holda to‘lanadigan 4 ballik chegarada 0,05 ball qo‘shiladigan bo‘ldi. Ya'ni:

• 1,05 ballgacha yetmagan abituriyentlar uchun – bazaviy to‘lov-kontrakt miqdorining 1,5 barobari;
• 1,06 balldan 2,05 ballgacha — 2,0 barobari;
• 2,06 balldan 3,05 ballgacha — 2,5 barobari;
• 3,06 balldan 4,05 ballgacha — 3,0 barobari.