Parij meri Fransiya prezidenti lavozimi uchun kurash olib boradi

Partiya qurultoyida nomzodni tanlash bo‘yicha o‘tgan ovoz berishda 62 yoshli ayol siyosatchi 1-o‘rinni egallagan.

Ann Idalgo ovoz berishdan keyin so‘z olib, taraqqiyot, ijtimoiy adolat va qonun ustuvorligini hamda tenghuquqlilikni qo‘llab-quvvatlashini aytgan. Uning ta'kidlashicha, ayol siyosatchi sifatida barcha fransuz ayollarining manfaatlarini e'tiborga oladi va hukumatga yetkazadi. Shuningdek, Idalgo atrof-muhitni himoyalash va iqlim o‘zgarishlariga qarshi kurashni muhim vazifalar deb atagan.

Ann Idalgo Ispaniyada tug‘ilgan. U Parij meri lavozimini 2014 yildan beri egallab keladi. So‘rovnomalar natijalariga ko‘ra, Idalgoni saylovchilarning 5-7 foizi qo‘llab-quvvatlashga tayyor.

Fransiya prezidenti lavozimi uchun asosiy kurash amaldagi prezident Emmanyuel Makron va “Milliy front” partiyasi yetakchisi Marin Le Pen o‘rtasida kechishi kutilmoqda.

Biroq ba'zi so‘rovnomalarga ko‘ra, o‘ng sentristik qarashlari bilan ajralib turuvchi jurnalist Erik Zemmur qo‘llab-quvvatlanish bo‘yicha Le Penni ham ortda qoldirmoqda, biroq o‘z nomzodini prezident lavozimiga ilgari surishi haqida rasman e'lon qilmagan.