Hakerlar ovozni klonlashtirish yordamida bankdan 35 million dollar o‘g‘irladi

Ta'kidlanishicha, BAAdagi banklardan birining boshqaruvchisi telefoniga qo‘ng‘iroq qilingan va go‘shakning narigi tomonida bankning ancha yillik mijozi ovozi yangragan.

Mijoz o‘z kompaniyasi yirik shartnoma tuzgani va shu sababli bank uning hisobraqamidan ko‘rsatilgan hisobraqamga pullarni iloji boricha tezroq o‘tkazib berishi kerakligini aytgan. Bank boshqaruvchisini yanada ishontirish uchun uning elektron pochtasiga bitim haqida huquqshunos tomonidan tasdiqlangan hujjatlar yuborilgan.

Boshqaruvchi mijozning ovozini yaxshi tanigani uchun hech qanday ikkilanishsiz pullarni aytilgan hisobraqamga o‘tkazib bergan. Biroq bir necha kundan keyin bankda aldanganlarini tushunib yetishgan. Aniqlanishicha, jinoyatchilar o‘g‘rilikni amalga oshirishda ovozni klonlashtirish texnologiyasidan foydalanishgan.

Tergov davomida mijozning pullari AQShdagi bir nechta hisobraqamlariga sochib yuborilgani aniqlangan. Ta'kidlanishicha, politsiyaga ayni vaqtda faqat shugina ma'lum.

Politsiyachilarning fikricha, jinoiy sxemaga butun dunyo bo‘ylab tarqalgan kamida 17 kishi aralashgan. Bu esa ularni izlashni yanada qiyinlashtiradi.